Bak jaroe kawom..
Meuneumat hukom ta peulara
Bak jaroe rakan
Seudeh seunang jeut ta puga
Bak jaroe bupati
Naggroe meuri maju peu han
Jaroe-jaroe lam seureukap
Pruet meungap-meungap deuek dirasa
Jaroe-jaroe ureueng gampong
Sabe seu-on luka jiwa
“Bak jaroe kamoe…
Keuneubah naggroe jeut neupeucaya!!”
Meunan hikayat kampanye baroe
Tapreh uroenyoe janji ho diba
Nibak uroenyoe katroh lom masa meujanji
Abeh di ungki hikayat buya
Calon presiden peugah droe bri bukti
‘oh tangieng bukti meubacut tan nyata
Dipeugah meunoe dipeugah meudeh
Abeh han abeh tanyoe di peujra
Ie mata meuleng-leng, hate seudeh
Badan ka lipeh tinggai teuk rungka
Yum barang ho uroe muhai aju-aju
Peu chit dipeulaku dum sarjana
Oh kajeut keu meuntroe ka meu sipatu
Bacut tan di eu naseb kamoe hamba
Breueh bu cot uroe kabeh lam umpang
Bu eunteuk malam jangan di Tanya
Keurija tan peng tamong han
Kadang cit kadang, mutang bak tetangga
Di ureueng kaya mangat hana ban
Tiep buleuen kadang Honda meutuka
Kadang ek mio atawa sedan
Oh akhee peukan jeut jak meudiwana
Teuman nyang gasien laen lom piasan
Tiep uroe Tuhan lam keurija saja
Bekle meudiwana mereka hai rakan
Bu tinggai buklam dakjeuet beusep keu lusa
Udep lam nanggroe nyoe wahe e rakan
Beu kreueh mental beu tahan siksa
Ji siksa le keadaan tanyoe e tungku
Ka di peu babu jeuet-jeuet masa
Teuma saran lon keu rakan meutuah
Tanyoe beu tabah dangdang naseb meutuka
Keudeh bak Po tanyoe peujok droe
Beugeubri nanggroe nyoe makmu beurata
Bek na le nyang gasien lam tiep lungkiek nanggroe
Neubri hai Po kamoe seujahtra
Beu mudah raseuki trok bak aneuk cuco
Beu aman nanggroe sampe akhe donya
Sepanjang 2008-2009